Thursday, March 4

सार्वजनिक यातायात खुल्यो : बस चढ्दै गरेकी गर्भवती महिला कल्पनाको मयुर यातायातमा भयो नयाँ अनुभव

July 16, 2020 553

भक्तपुर- भक्तपुरको जगाती चोकमा काठमाडौँतर्फ जान मयूर यातायातको गाडी रोकियो । एउटै स्टेशनमा सात जना यात्रु चढ्न बसको ढोका अगाडि उभिए । टाउँकोमा हेड कभर, मुखमा माक्स, हातमा पञ्जा र सेतो व्यक्तिगत सुरक्षात्मक उपकरण (पीपीई) लगाएका सहचालकले ढोकाबाटै थर्मल गनले यात्रुको तापक्रम नाप्न थाले । यात्रु अचम्म मानेर हेर्दै थिए । भित्र छिरेका एक यात्रु एक सिटमा बसे । सधैँ भीड र घुँइचोमा सास्ती खेप्दै ठेलमठेल गर्दै सार्वजनिक यातायातमा यात्रा गर्नुपर्ने यात्रुले यति सहजको यात्रा गर्ने दिन पनि आउँछ भन्ने यसअघि कल्पना पनि गरेका थिएनन् ।

कोभिड– १९’ को नियन्त्रण तथा रोकथामका लागि सरकारले लगाएको बन्दाबन्दीपश्चात् सार्वजनिक यातायात सञ्चालन गर्ने निर्णयपछि बिहीबारदेखि ललितपुरको लगनखेलमा गुुडेको साझा यातायात बस ।

बस चढेपछि भक्तपुर च्याम्हसिंहमा भाडामा बस्दै आउनु भएकी पवित्रा लामाले यस्तो सहज यात्रा पनि गर्न पाइन्छ भन्ने कहिल्यै नसोचेको बताउनुभयो । सधैँ भीड र ठेलमठेलमा यात्रा गर्दै आउनुको पीडा झेल्दै आएका यात्रुलाई एउटा सिटमा एक जना मात्रै बसेर यात्रा गर्दा सहज र सुरक्षित भएको महसुस गरेको उहाँले बताउनुभयो ।

सूर्यविनायक चोकमा साझा बस चढेका सूर्यविनायक गःपली निवासी राधेश्याम श्रेष्ठले सार्वजनिक यातायात चल्दा अप्ठ्यारोमा परेका यात्रुलाई राहत मिलेको बताउनुभयो । उहाँले भन्नुभयो, “आफ्नो साधन नहुनेलाई निकै सास्ती थियो, अब साझा बस चढ्न पाइयो, धेरै सहज भएको छ । आफ्नो सुरक्षाका लागि माक्स लगाएको छु, सेनिटाइजर बोकेरै हिँडेको छु, कहीँ केही छोइए हातमा सेनिटाइजर लगाउँछु, सुरक्षाको उपाय अब आफैँले अपनाउने हो ।”

कोभिड– १९ को नियन्त्रण तथा रोकथामका लागि सरकारले लगाएको बन्दाबन्दीपश्चात् सार्वजनिक यातायात सञ्चालन गर्ने निर्णयपछि बिहीबारदेखि पुुलचोकस्थित साझा यातायात बसमा सेनिटाइज गर्दै । तस्वीर ः रोशन सापकोटा

बस चढ्दै गरेकी गर्भवती महिला कल्पना विष्टले साझा यातायात चल्दा निकै राहत मिलेको बताउनुभयो । लकडाउनका कारण सार्वजनिक यातायात नचल्दा ट्याक्सीले मनोमानी भाडा असुल्ने गरेकोमा त्यसबाट मुक्त पाइएको उहाँको भनाइ थियो । उहाँले भन्नुभयो, “असअघि गर्भ जचाउन पाटन अस्पताल जाँदा ट्याक्सीले सूर्यविनायकबाट रु तीन हजार लिन्थ्यो, अब बस चल्न थालेपछि ट्याक्सीलाई महङ्गो भाडा तिर्नु परेन, आज धेरै राहत पाएको महसुस गरेको छु ।”

सरकारले लकडाउन खुकुलो बनाएपछि निजी यातायात नहुनेले राहत महसुस गरेका छन् । काठमाडौँबाट रत्नपार्क, नयाँ बानेश्वर, कोटेश्वर हुँदै भक्तपुरको सूर्यविनायकसम्म साझा यातायात दुई र जगातीसम्म मयूर यातायातले दुईवटा बस सञ्चालन गर्न थालेपछि सार्वजनिक यातायातमा यात्रा गर्ने यात्रुले निकै राहत महसुस गरेका छन् ।

कोभिड– १९’ को नियन्त्रण तथा रोकथामका लागि सरकारले लगाइएको बन्दाबन्दीपछि सार्वजनिक यातायात सञ्चालन गर्न निर्णय गरेपछि बिहीबारबाट गुुडेको साझा यातायात बसमा यात्रुु ।

कोरोना भाइरसको सङ्क्रमण रोक्न सरकारले गत चैत ११ गतेदेखि लगाएको लकडाउन पछि बन्द भएको पनि अन्य यातायात भने सञ्चालनमा आएका छैनन् । सरकारले मापदण्ड निर्धारण गरी तोकिएको भन्दा ५० प्रतिशत बढी भाडा लिएर सार्वजनिक यातायात सञ्चालन गर्न आह्वान गरे पनि निजी बस व्यवसायीहरुले विभिन्न माग राख्दै सार्वजनिक यातायात सञ्चालन गरेका छैनन् ।

उपत्यकामा साझा यातायातले प्रारम्भिक चरणमा २६ वटा बस सञ्चालन गरेको छ भने साझाले यसअघि बस चल्दै आएका आठ वटा रुटमा सेवा शुरु गर्न लागेको बताइएको छ । सरकारको निर्णयानुसार सेवालाई प्राथमिकता दिएर पूराना सबै रुटमा बस चलाउने जनाएको हो ।भक्तपुरमा यसअघि सञ्चालन हुँदै आएका भक्तपुर बस, मध्य उपत्यका बस, मध्यपुरथिमि बसलगायत यातायातका कम्पनीहरुले सार्वजनिक यातायात सञ्चालन गरेका छैनन् । सार्वजनिक यातायात सञ्चालन नहुँदा विशेष गरी ग्रामीण क्षेत्रका बासिन्दा सबैभन्दा बढी मारमा परेका छन् ।

प्रतिकृया दिनुहोस्